Calvaris in Deutschland

Onte foi un verdadeiro día de merda. Erguémonos tarde e eu fixen de Ovos á Extremeña para xantar, aos que lle botei un pouco chili e co chourizo picante que mercara en "El Mercado Español" picaba demasiado, pero estaba bo. Costoume rematalo porque fixen moito. Despeois de faceren sesta, marchamos todos ás canastras a xogar ao baloncesto, pero non tiñamos un carallo de ganas, pola calor que había. Teño que lembrar que esta fin de semana tivemos aquí case 30º con ceos compretamente despexados, é dicir, unha calor de carallo. Despois decidimos coller o S-Bahn e ir ao centro a pasear un pouco.
Alí cabreeime un pouco porque non paraban de falar en catalán, polo que Eloi se desculpou dicindo que non se decataban. Cousa que comprendo e envidio, xa que na patria non me ocorre eso, xa que o noso idioma está case morto.
Menos mal que voltei a ver ao fulano que tocar o aparello ese dándolle voltas ao brazo, que xa pensei que morrera :-) Gústame moito oílo porque ten cancións moi ledas.
Despois ao irmos cara o Anatolien para tomar eu un Kebap, e de pararnos un pouco no concerto de Schloßplatz, atopamos un fulano destes que fan espectáculos na rúa. Ao principio púxose a imitar á xente que ía pola rúa, de xeito moi gracioso, que causou que ninguén máis se movese do sitio e que ficasemos todos alí. Despois fixo un par de números cómicos, un par de globos para os rapaces, xogou co diávolo, pero non cun só, senón con dous á vez, de xeito totalmente incríbel, incluso botando o aparello a unha altura meirande que a do edificio diante do que estaba. Tamén se subiu a un monociclo de dous metros de altura facendo de malabarista con lume. Totalmente incríbel. Isto fíxolle gañar alí polo menos 200€ amén dos clientes para festas particulares, que tamén se dedicaba a iso. Totalmente incríbel.

Pois hoxe quedamos de ir coa tándem de Eloi a unhas viñas que están nun pobo do quinto carallo, para o que tivemos que coller un S-Bahn, un bus e aínda andar un bo cacho. Alí a xente levaba carros de cervexa e radios e festexaban o 1 de maio. Ao parecer hai dous lugares semellantes, un para os xoves e outro para os pais cos fillos.
Non o pasamos mal, aínda que facía moita calor e non tiñamos nada para mollarnos. Alí nos atopamos tamén co Buddy de Jero, co que nos metemos un pouco por se ligar á sueca que vén connosco a clase de alemán. Polo que se ve, ela non quixo ir a durmir con el a casa, que estaba moi cansa e se tiña que erguer cedo ao día seguinte :-)
Pois iso, que moita calor e moita xente bailando, enriba dos tractores, carros e outros inventos. A verdade é que eu estaba completamente ridículo, porque cando saín da casa non pensaba que fose facer tanta calor. Incluso levaba a chaqueta. Así que ao chegar a casa de Cristian prestoume un bañador, que me puxen sen negún pudor alí na festa quitándome o pantalón e quedando en calzóns, iso si, detrás dunha caravana. Xa podedes imaxinar a foto, eu, coma miña camisola de "GA LEGO", unhas bermudas de flores e zapatos e calcetíns negros. Pero que carallo, eu estaba maís cómodo ca os demais, así que lles desen polo cu :-)
Despois á volta no S-Bahn, no que iamos derreados, subiron dúas mozas, das cales unha estaba de bo ver, que se sentaron ao noso lado, pero como nós falabamos delas e nos riamos, trocaron o sitio e fóronse cara outro sitio. De verdade, que indignación collín, nin que fosen o centro do universo! O peor do peor.

Onte luns coma sempre, erguerme para estar na internet un pouco e despois a xantar a mesma merda de sempre. É incríbel como se apañan para facer que algúns días teñan dúas ou tres cousas caralludas, e outros teñen só merda :-( Estes días toca merda. Ademais, o prato do mes son unhas salchichas rarísimas que non teñen ningunha boa pinta.
Despois pola tarde fun facer a compra. Case quedo sin aceite, que non había no Kaufland, pero ao final atopei no ALDI. Cheguei ao bus polos pelos, pero cheguei.
Despois agardei pacientemente a que chegase a hora das clases de alemán, que durou até as 21:00, hora á cal fun con Désirée até a súa casa coller o CD que lle emprestara dos Heredeiros da Crus, pero ao final non oiu. Peor para ela. Certar tiranteces tivemos por mor do carallo do CD, pero ao final non foi nada.
Ao chegar a casa fixen de cea uns Spätzle con salsa de nata e champiñóns (receita especial de Dores ;-) ), que teño que dicir que me saiu caralluda. Estaba fantástica. Os Spätzle son unha especie de pasta branda que se fai só con fariña e auga. Eu merqueina fresca no Kaufland. Gustoulle moito aos meus veciños alemáns.

Pois iso, que hoxe (martes) pola mañá quedara con Cristian para ir ao consulado español en Stuttgart para solicitar o voto por correo para as eleccións galegas. A verdade é que non me perdoaría non votar...
Ao chegarmos alí preguntei polos trámites e lamentabelmente teño que empadroarme alí para facelo. Burocracia da merda. Non podía ser coma unha oficina de correos á que chegas, e dis que queres votar por correo, mándanche os papeis a casa e despois vas por alí a depositar o voto? Non, pois ten que ser así.
Tal como nos dixeron, no papel hai que pór o municipio onde queres estar censado a efectos electorais. Aparte, causas baixa en España, co cal te tes que empadroar outra vez cando voltes. Con isto pensei, que carallo, que se dea Cristian de alta tamén aquí e que vote, e non só Cristian, senón toda a xente que coñezo aquí :-) Xa convencera a Cristian, que estaba todo orgulloso escribindo o nome de "Noia", que lle parecía moi galego, pero ao final non quixo polo de cursar baixa en España. Aínda que se total se ten que dar de alta outra vez ao voltar, vén sendo a mesma merda, porque de empadroarte outra vez, que máis dá que veñas de Stuttgart, ca de Camariñas? Ao final Fraga vai facer das súas e eu non... Pero tranquilos, que desta vez ímolo conseguir...
Supoño que haberá outra vez noite electoral na casa de Gabriel, polo tanto, rapaces, ide instalando o Skype para poder estar convosco alí :-)
Despois pola tarde quedei co meu outro tándem, que é iso de coñecer a unha persoa que aprende o idioma no que ti es nativo e el é nativo no idioma que aprendes ti. Resultou ser un fulano de 33 anos, pero xa estiven falando con el sobre polícita e chegamos á conclusión de por que carallo España non é un estado federal. Xa vou sementando nacionalismo por aquí... De todos os xeitos é un tipo simpático, así que probabelmente fique con el, porque non vou deixar a Jero cun fulano que é 10 anos maior ca el...
Ás seis, houbo Frühlingfest, pero esta vez só tomei unha cervexa, que despois do cagallón da semana anterior, tiña suficiente. A moza que está ao meu lado é o tándem de Eloi, que foi a que nos invitou á festa do 1 de Maio en Korb. Quizais debería tamén buscar outro tándem un pouco máis xove, porque cun de 33 anos só se pode falar, nada de saír de festa nin nada semellante, e ademais, están de traballo até as orellas, así que tampouco podemos vernos todo o que me gustaría... Con dous quizais será mellor. Terei que ir polo Sprachzentrum, quizais o venres, o día que comecen as clases de portugués...
Ceei alí na Frühlingfest, un pouco de pasta con chucrut e unha Brarwurst. As salchichas alemanas non se poden comparar coas que se venden nos supermercados galegos...

Onte mércores pola mañá tiven que ir ao consulado facer os papeis todos. Puiden arranxar todo ser problema, pero ao final fiquei parolando co conserxe do consulado, que é de Ourense, e os dous coincidimos en que ese home ten que marchar da Galiza, é dicir, que é un pouco "rojo". Estiven alí un bo cacho falando con el e co seu colega de Madrid que flipaba coas cousas que lle contaba, sobre o que ocorreu en Galiza nos últimos anos.
Despois a xantar á mensa e para casa a non facer nada.
Despois ás oito tiña que quedar co meu tandem. Atopeino de casualidade no S-Bahn que ía coller para ir velo, xunto cos fineses, que ían ver un partido da súa selección de Hockey sobre xeo. Ceei con el un Döner Kebap no restaurante habitual e despois un xelado de McDonnalds, que está coa oferta dun €. A verdade é que creo que falo cada vez peor alemán, pero el díxome que non era certo, e que tiña unha boa pronunciación.

Hoxe tocoume ser o xestor da xente de Igalia en Stuttgart. Que saibades que cando queiramos abrimos unha sucursal aquí. Así estarían as mellores empresas en Stuttgart: IBM, Bosch, Igalia, Daimer Chrysler (Mercedes), Porsche... Pois iso, que fun aos dous Hostais a informarme de como ía o tema das habitacións e todo iso. Levoume toda a mañá.
Pola tarde, capítulo de los Serrano e despois á noitiña a facerlles efectiva a reserva a Juanjo e Alex, que xa por sorte está completamente acabada. Van ter sorte, que a liña de tranvía que leva ao Hostal dende o centro é a miña favorita, a que ten algo de turístico. A mágoa é que xa non haberá Frühlingfest cando eles estean aquí, porque remata esta fin de semana...

Onte venres erguinme para coller o S-Bahn e ir dereitiño a clase de portugués. O problema foi que ao chegar alí e comezar a falar en galego coa profesora, díxome que sería mellor que fose quizais a portugués 3. O que ficou alí foi Huseyin, que por suposto, non tiña nin idea de nada.
Despois, ao chegar topeime con Marcin o polaco. E decidimos ir a mercar as entradas para o Episodio III "Die Rache der Sith". A nosa idea é vela en inglés para enterarnos mellor do tema, e de paso, vela en versión orixinal. Fomos primeiro ao centro a ver nuns cines grandes, pero dixéronnos que non había versión orixinal en Alemania, algo que me extrañou un pouco polo que me dixeran no cine de Vaihingen, donde só poñen películas en versión orixinal, e onde por suposto, está o episodio III. Así que alá nos fomos. 7,50€ que pagamos, pero supoño que pagará a pena.

Pois hoxe erguinme para xantar e ir ao fútbol. Por fin, xa o ía necesitando coma xantar. Pois quedei co americano, pero o simpático, para irmos xuntos até alí. Demos a volta a todo o estadio porque non atopabamos a porta, pero ao final entramos e xa nosa agardaban alí dous turcos amigos nosos. Chegaron despois todos os demais e comezou o partido.
Primeira parte terríbel. Non saben xogar polas bandas. Saen sempre polo centro, non abren á banda, non centran case nada... Iso si, estadio incríbel, con todas as gradas cubertas, póñenche cando vai saír o metro nas pantallas xigantes... Moi ben. Os "Riazor Blues" cantan absolutamente durante todo o partido, pero tamén hai que dicir que só eles, que o resto do estadio está case calado :-)
A segunda parte foi mellor. Houbo toques de calidade de "De Guzman", que é o xogador que ten fichado o Dépor do Hannover, un deles un tiro lonxano dereito á escuadra que atallou o porteiro dun xeito impresionante... E por fin... TOOOOOOOOOOOOOOOOR (gol) de Kevin Kuranyi! No minuto 88! Así que gañamos o partido e a festexalo na Frühlingfest.
Désirée cabrada porque non a agardamos para irmos ao fútbol, pero xa sabedes como teño a cabeza.
Chegamos á Frühlingfest e non había xa sitio en ningunha carpa, así que andamos un pouco até atoparmos aos outros españois. Estiven alí até as 10 e media e xa me vin para casa, mentres xantaba un pouco de chucrut con pasta e unha Brarwurst xigante. Hoxe nada de mazarocas de millo...
O carallo foi que ao saír, atopei a Désirée que marchara para a casa e que estaba outra vez cabreada porque non a avisamos de que foramos para outro sitio, pero xa me estou fartando un pouco do tema, porque xa podía gastar tamén 0,30€ e chamar a calquera de nós ao móbil, que tanto aforrar, non é bo...

Pois hoxe había no meu edificio unha festa grega, onde eu estaba invitado pola compañeira grega do curso de alemán. A verdade é que me fastidiaba un pouco porque coincidía xusto coa carreira de Alonso, aínda que tampouco tiña onde vela... Pois iso, que as cousas que había alí estaban caralludas. Tiñan dous tipos de arroz, arroz envolto nunhas follas de algo que non lembro que era... Tamén unha especie de pasta vermella feita de tomate que estaba xenial e unha especie de cousas negras que non eran cogumelos, pero que estaban riquísimos tamén. Os postres, moi doces, co cal, caralludos.
Despois fomos á Frühlingfest varios que estabamos na festa, pero nada de beber, que xa era o derradeiro día. Alí subímonos nos autos de choque e despois xantamos algo típico, que xa remataba o choio. E eu despois a casa a escoitar o partido do Dépor, que por fin gañou!

Pois hoxe despois de erguerme e estar un pouco na internet, fun xantar á mensa con Eloi e Jero onde nos puxeron un prato típico suevo, coa salsa típica. Como compremento, collín por suposto, Spätzle, co que tiña un superprato suevo caralludo.
Despois, ao saír de xantar, fun á facultade a ver se atopaba un proxecto. O que fixo o cordinador de Erasmus foi levarme por algúns despachos a ver se podían ofrecerme algo. Só un me ofreceu algo, que vai sobre problemas de nodos móbiles, xa sexa de enrutado, consultas de datos almacenados en nodos, problemas de localización... Seguramente me quede con el, porque acabo de recibir a resposta de Porsche, que vai ser que tampouco me collen :-) Só me queda a resposta de Mercedes e Bosch, pero creo que lle vou dicir que quedo con el, e se despois me respostan nos quince primeiros días, pois aínda podo deixalo.
Despois pola tarde, clase de alemán até as nove. E ao saírmos, fixemos a cea todos xuntos, pero non sei por que, sempre nos leva moitísimo tempo facelo, así que rematamos de cear ás doce e media :-( E xa me vou deitar...

Pois hoxe puxen mal o móbil e non espertei á hora que tiña que espertar, senón que o fixen unha hora máis tarde. De todos os xeitos o que tiña que facer era ir con Cristian a Deutsche Post para recoller un paquete. Resulta que me chegou tamén a mi un recibo para recoller unha carta certificada. Tería que facelo mañá, pero por sorte atopei ao carteiro na parada do autobús, que me deu a carta. Despois fomos a recoller o paquete de Cristian, onde había xamón, chourizo ibérico... Só agardo que non o comesen todo agora pola noite.
Despois xantamos na mensa e fomos tomar un café. Despois fun á facultade para dicirlle ao meu futuro director de proxecto que ficaba con el. Díxome que mañá fose por alí para falar con el sobre todo o tema.
Despois toda a tarde facendo o parvo.

Pois nada, estes dous días foron un lixo. Non fixen nada interesante, agás xogar un partido de baloncesto contra chineses onte pola tarde. Debería ter ido tamén a clase de "Landeskunde: Baden-Württenberg" pero esquecínme por completo.

Pois onte pola mañá erguinme bastante cedo para ir falar co meu presunto director de proxecto. Resulta que o proxecto fin de carrera aquí se chama Diplomarbeit e hai algo tamén que se fai á metade que se chama Studienarbeit que ten uns créditos similares ao proxecto en Coruña. Eu coma non tiña nin idea do tema, nin Amparo (manuela) tampouco, pois puxemos Studienarbeit e resulta que agora non o puiden trocar. Así que me veu bastante ben para dicirlle ao fulano que non podía trocar o contrato de estudos e que tiña que facer o Studienarbeit. Como o fulano me viu con interese, nada máis lonxe da realidade, que fago iso porque non hai nada máis, pois díxome que o que me tiña preparado non vale, porque só podía ser un Diplomarbeit, pero que me buscaría algo no mesmo proxecto. Co cal teño que agardar até o mércores.
Despois pola tarde, xantar e baloncesto. Fiquei mallado de todo, porque o carallo dos chineses xogan ben.
Escoitei Zapping (Mackoys) e fixen a cea, que tomei na cociña de Jero por mor de que estaban os pais del aquí e había que facer un pouco de vida social :-)
Despois estiven na internet até as dúas porque aproveitei para escoitar Zapping outra vez, que o programa fóra bastante bo...

Pois estes días non pasou nada importante, nin tampouco fixen nada interesante. Porque entre outras cousas, estou que non mexo porque chegue o mércores para ir a ver o acontemento máis importante do ano, agás por suposto o meu quinto aniversario co meu amor, que é Star Wars Episode III Der Rache der Sith. Xa estiven a estudar para o exame. Por exemplo, onte vinme os capítulos IV, V e VI. Hoxe toca o I e mañá venres o II e no cinema, en versión orixinal, o III, por fin!
Noutra orde de cousas, tamén xoguei ao baloncesto contra tres romaneses e un ucraíno, que por certo, era moi simpático, entre outras cousas polo seu acento completamente ruso á hora de falar alemán.
E nada máis que contar destes días.

Pois hoxe pola mañá fun ao consulado aproveitando que Eloi tamén tiña que ir, para preguntar onde estaba a miña documentación electoral, que teño medo que non me chegue a tempo... Despois fomos a xantar a onde sempre, á mensa, onde tamén había prato suevo, aínda que me repetiu toda a tarde...
Pola tarde, pois por fin vin o terceiro CD de "El aviador" en alemán, que comecei o outro día, que pensei que só eran dous CDs. Vin os dous primeiros e cando rematou o segundo decateime que xa precisaba un máis... así que tiven que baixalo. Despois agardei a que chegase Cristian para ver o Episodio I de Star Wars, para ir preparándose para mañá! Que xa é mañá! Ás 21:30! Teño que lembrarme de coller a cámara de fotos.
Despois, pois a cear, falar con Laura e facer un pouco o parvo antes de deitarme...
Mañá tamén teño que falar co meu director de proxecto, así xa vos contarei o que teño que facer...

Pois hoxe erguímne tarde por mor de me ter deitado onte despois de escoitar Zapping, de RadioVoz. Recoméndollo a todo o mundo, por certo, de 8 a 9 todos os días e tamén o repiten de 1 a 2 da noite. Por certo, hoxe fixeron un chiste caralludo, que eu nunca oíra. Chamaron TelePerbes á TVG, supoño que en relación ao chalé que Fraga construiu de xeito presuntamente ilegal.
Lembreime que tiña clase de portugués hoxe ás 13:15, así que fun xantar cedo á mensa do centro e ala fun. Cando chegou a mestra falei con ela, e o que fixo foi recomendarme ir a Portugués 5, é dicir, prepararme para a proba, que non sei exactamente a qué equivale...
Despois voltei e agardei até que puiden falar co meu director de proxecto, que me confirmou que si podo facer algo. Por fin sei algo seguro! Vou facer cousas sobre enrutamento en rédes móbiles, é decir, cousas de móbiles, PDAs, etc... e creo que vou chupar álxebra de grafos por un tubo... pero é o que hai, e ademais, creo que vou aprender moito alemán, co meu director, Dominique Dudkowski, que fala amodiño e ademais é moi simpático. Por certo, a simulación téñoa que facer con ns, que é ese que se usa un pouco en Redes de 5º e tamén xeño que usar un programa de xestión de bibliografía, o JabRef, que serve para ir indexando todos os documentos que se van lendo e poder acceder despois de xeito máis cómodo a eles, e tendo despois un ficheiro Bibtex completamente usábel. Ten pinta de estar moi ben.
Despois estiven vendo o Episodio II, preparándome para o que levaba agardando 3 anos, que é o estreno do Episodio III.
Fun con 3 veciños meus, Cristian e o polaco, en total cinco, no coche dun dos meus veciños, Alex. Ao chegarmos á porta do cinema, fomos Cristian e máis eu, mercar un Kebap, pero ao final tomamos un Lahmacun, que é unha especie de pizza condimentada, onde che poñen carne de Kebap tamén, e póñencha un rolo, que é máis sinxelo de xantar.
Non había moita xente disfrazada, de feito eu era un deses raros que levaba a miña espada láser. O cinema era unha merda, pero seguramente era o mellor que se podía atopar onde puxesen a película en versión orixinal. Tivemos que agardar un bo cacho até que a película comezou.
Pois iso, que non sei se porque non entendín demasiado, que nin sequera tiña subtítulos en alemán, que non me gustou demasiado. Eu creo que agardaba algo máis. A historia pareceume un pouco pobre, e ademais había algunha cousa que me pareceu completamente fóra de lugar, pero que non vou contar aquí para non desfacer a película á xente que lea o meu weblog :-) Comentádeme que vos pareceu...
Na foto, de esquerda a dereita, Marcin o polaco, Alex o meu veciño alemán, eu, Cristian o catalán, e Nick o USAno republicano.
E outras das cousas coas que acabo de flipar é o nomeamento do meu profesor de Literatura Galega de 3º de BUP no Colexio San Narciso, Héctor Silveiro. Noraboa para el. Despois da novela que escribiu o meu outro profesor, xa o creo todo.

Pois hoxe erguíme para comerzar o traballo do meu Studienarbeit. O que fixen hoxe foi basicamente instalar o software que me pediu o director. Iso foi o que fixen en todo o día. O que máis traballo me deu foi o ns2 do carallo. Porque tiña unha chea de dependencias que tiven que satisfacer. Comezando por Tcl e Tk, que non puiden instalar as de debian, porque o OTcl tampouco vén en Debian e hai que instalalo, e hai que especificarlle unha única ubicación destes paquetes, que non ocorre ao instalar os paquetes Debian. É dicir, cos paquetes Debian as cabeceiras están en /usr/include e as outras cousas noutros lugares, e se lle digo onde están as cabeceiras, non é quen de atopar o resto do paquete, e se lle digo onde está o resto do paquete, non atopa o resto das cousas. En fin, unha merda que me trouxo tolo un bo cacho. Despois, tiven problemas con outros paquetes, que no configure non atopaba non sei que ficheiro, que si estaba instalado e non me quedou máis remedio que trucalo. Unha tolemia.
Despois quixen instalar o paquete runtime de Java, como paquete Debian a partir do rpm, pero resulta que non aparecía o rt.jar por ningures, co cal, ao executar calquera cousa dicía que non atopaba o java.lang.Object! . Descubrín que ao descomprimir o paquete que non é rpm, xera o rt.jar el só. Tentei que o fixese tamén o alien coa opción -c, pero non funcionou, así que ao final instaleino do outro xeito, sen paquete Debian. Java precísoo para o JabRef, que serve para para manter bibliografías BibTeX, de xeito moi cómodo, que permite tamén abrir os ficheiros se se teñen en local, etc. Está moi ben e recoméndollo a todo o mundo.
Tamén tiven clase de Landeskunde: Baden-Württenberg, onde a mestra falou do modelo federal e dalgunhas cousas máis. Unha mágoa non entender todo perfectamente, porque é unha das cousas interesantes, iso do federalismo ;-) A ver se uns que sei eu en España van tomando nota..."

Pois estes tres últimos días non fixen máis ca ler papers que me mandou o director. Estiven facendo un pouco o parvo tamén o venres a ver se conseguí pór a consola de linux en UTF8, pero ao final claudiquei e puxen todo outra vez en ISO. Paseime ao lado escuro, pero polo menos eu loitei algo... Ler o primeiro paper levoume unha chea de tempo porque o meu inglés estaba xa terminal, pero agora semella ter resucitado un pouco.
O sábado lin outros dous papers e despois fomos facer a compra para facer pola noite carne á grella. Ao final, puxen eu os cartos e hai xente coma Cristian e Jero que non me pagaron aínda, pero non son só eles. A carne á grella estivo ben, con salchichas e outros tipos de carne tamén. A foto que se ve é de Pasi pondo xa a carne a asar.
O domingo marcharon todos a Estrasburgo, pero eu fiquei na casa porque tiña cousas que facer, que aínda me quedaban polo menos 6 papers por ler e foi o que fixen onte en todo o día, diante do ordenador a ler pdfs sobre enrutamento en redes móbiles ad hoc. Polo menos tamén vin un par de capítulos de "Los Serrano", moi bos, por certo.

Pois iso, que hoxe me erguín para ir a falar co meu director de proxecto, pero ao chegar alí non estaba. Resulta que me trabucara de hora e en vez de atopármonos ás doce, tiñabamos que nos atopar ás dúas, así que voltei a casa e agardei até a hora de xantar, que fun á mensa.
Despois pois fun alí a falar con el até as catro da tarde, hora á que fun ao centro a ver se podía mercar uns novos auriculares porque os que teño, de vez en cando, non se oen na orella dereita. Cousa que me fode moitísimo porque non podo oír música a partir das 10, que é cando se ten que deixar de facer ruido. Pois os máis baratos que atopei foron uns de 9€, co cal decidín buscar un alongador de cable stereo e poder usar os do discman, pero resulta que un alongador valía 6€! Así que por 3€ máis teño uns cascos novos, que case me vai mellor.
A miña conversa con el foi interesante. Ensineille como instalara todo, e gustoulle bastante como estaba facendo as cousas. Deume algo máis para ler e ímonos atopar outra vez outra vez o mércores xa para facer o contrato e o plan que vou seguir. O contrato é unha formalidade que se fai aquí, pero de cartos non vou ver un peso.
Despois voltei para facer uns cantos deberes e marchar a clase de alemán, onde o pasei bastante ben, porque tiven que preparar unha presentación sobre unha viaxe, e aos do lado tocáronlle as Illas Canarias, así que pedínlle que nolo trocasen para poder falar de Teneriffa, que é o que coñezo despois de ir alí dous anos seguidos. Lembreime moito do ben que o pasaramos alí. E incluso lle contei cousas á profesora, co que me dixo que se algún día ía a Tenerife, que me preguntaría... Máis sorte tivo a moza grega, que lle tocou falar da súa propia Illa :-) Por certo, estaba hoxe de cumpreanos e fun a tomar uns cachiños de tarta á cociña, que nos invitara. Por fin podo esquecerme do gorro de cumpreanos, do que estaba en posesión dende o meu.
Pois nada, xa me deito, que mañá teño unhas clases de alemán sobre "Landeskunde: Aktuelle Themen in Deutschland", onde nos ensinan a ler xornais, e de paso, nos enteramos do que pasa por aquí, como a caída do SPD (partido socialista alemán), en Nord-Rhein Westfalen, en favor da CDU (partido popular alemán), polo cal, Schröder está pensando xa en convocar eleccións anticipadas ao non ter todos os apoios que lle gustarían...

Pois hoxe pasei unha das maiores vergoñas da miña vida. Fun a clase de "Landeskunde: Aktuelle Themen in Deutschland", que é unha clase onde se len xornais e tal e aprendes linguaxe culta. O tema é que só se pode faltar dúas veces e xa levaban catro semanas de curso, así que a fulana me preguntou o meu nome. Díxenlle que era a primeira vez que ía, ao que me respondeu que non podía ser, e que tiña que marchar. Eu díxenlle que só quería aprender, que non me importaban os créditos, pero a ela dáballe igual así que me tiven que erguer e marchar. Merda para ela, que me fixo perder unha preciosa hora do meu proxecto para iso. De todos os xeitos, é mellor así porque non perdo esas horas semanais nese curso.
Despois pola tarde estiven traballando e tamén falando un bo cacho co meu bo amigo Mateo, da USAnia que me tratou de convencer das súas vontades, pero que non conseguiu ;-) . Pois iso, que van casar el e Cristina, así que moitos parabéns para eles!
E despois, fun até unha festa sorpresa de cumpreanos dun rapaz francés polo que tivemos que agardar un bo cacho, pero estivo ben que á fin puidemos xantar algo bo. Francés, pero bo. O mellor de todo, foi que por casualidade, o pai da moza del é galego, e el tiña unha botella de caña branca, da casa, desas de verdade, nada de merda de supermercado. Cunha cantidade equivalente a un ou dous "chupitos", foi máis que suficiente para se convenceren todos de que era a bebida máis forte que probaran nunca. Incluidos tamén os fineses, entre os cales estaba Simo, un fulano de 1,90 ou máis, inmenso, sempre fardando do seu vodka finés, sucumbiron ante a caña galega! Simo dixo algo como: isto é tan forte que queima todos os microbios da gorxa... Liisa dixo despois que aída sentía a quentura no estógamo... GALIZA CALIDADE!

Pois hoxe erguinme para traballar algo no proxecto, porque despois tiña cita con Dominique e tiña medo que me botase bronca por non facer nada, así que a iso me puxen. Despois fun xantar á mensa un pouco máis cedo do normal porque a cita era ás 13:30. Pois iso, que falei con el case dúas horas, pero mentres falaba con el, propúxenlle como podiamos facer e que algoritmo podiamos tomar de referencia para traballar e as modificacións que se me ocorrían no momento. Gustáronlle moito as ideas a pesar de que as pensei así non momento e incluso discutimos un pouco sobre o tema, pero ficou moi satisfeito e díxome que estaba no bo camiño.
Despois fun a recoller a Germán e Fernando, dous chilenos que veñen tamén á GUADEC e que me dixera a organización que recollese, así que alá fun cun cartel coa bandeira de Chile que poñía "FERNANDO GERMÁN GUADEC". Como Juanjo e Alex chegaban 15 minutos máis tarde, agardamos xa por eles e cando chegaron, saqueille outro cartel coa bandeira galega (con estrela por suposto) que puña "JUANJO ALEX GUADEC", que lles fixo moita coña.
Acompañamos a Fernando que tiña un hotel no centro e despois fomos os catro até o Youth Hostel a que eles deixasen as súas cousas. Cando o fixeron, fomos ao centro e xa cara Untertürkheim ao restaurante con especialidades suevas, mentres vimos a final da Champions, pero só até que rematou a segunda parte. E no centro demos unha volta por Königstraße, onde en Hauptbahnhof xa collín o tren para voltar para casa.

Hoxe fomos pola mañá a dar unha volta Juanjo, Alex, Germán e mais eu. Fixemos a ruta que vén no mapa de Stuttgart, incluida a Casa de Hegel. Cando estabamos a descansar un pouco, recibín a chamada da organización da GUADEC para irmos alí a xantar, mentres se discutía o que se podía facer. Ao chegarmos alí, Juanjo e máis Alex marcharon para que non os collesen para traballar e Germán e máis eu ficamos alí. Eu escaqueeime de todo o traballo que puiden, aproveitando que os tiña aquí a eles, dicindo que tiña aquí dous amigos e que non podía traballar porque tiña que estar con eles. O que si dixen, que fun parvo, foi que si que podía ir recoller alguén no aeroporto. Craso erro, xa que me adxudicaron un mañá venres ás 8:45. A anécdota do día foi que me apuntaron un par de nomes de pila na folla, que eran Nat e Miguel. Por suposto, eu nin puta idea de quen eran, así que lle pregunto a Juanjo e Alex: Sabedes quen son un tal Nat e un tal Miguel, que teño que recollelos mañá cedo? E dinme pois Miguel de Icaza e Nat Friedman. Parvo de min que non caín polo menos no Miguel! Pois iso, que lles gustou moito o Döner Kebap e que me vou deitar, porque se chego tarde a recoller a Icaza de Friedman, dame algo...

Pois nada, que hoxe me erguín cedo para ir a recoller ao carallo de Icaza e a Nat Friedman ao aeroporto. Cheguei xusto á hora que debería chegar o voo, pero o cartel xa marcaba "aterrado", así que me puxen alí a agardar co cartel que fixera Germán. Agardei media hora e ao cabo dela, chamei á organizadora. Que me dixo que xa estaban no hotel. Comentándollelo a Juanjo e Alex, chegamos a dúas conclusións, ou que eran uns maleducados ou que a organización non avisou de que os irían recoller. Case que nos decidimos pola segunda, porque cando chegamos ao edificio da GUADEC non había case ninguén, nin estaban as cousas feitas nin nada... Porque se eu fose Icaza e me fosen recoller, agardaría cando menos un cuarto de hora, por se houbo algún problema, ou chamaría por teléfono para preguntar...
O que fixemos en todo o día foi ir facendo fotos por aí, de min co cartel en diversas posturas, significando que os andaba a buscar aínda, coma por exemplo, no tren, na catedral de Ulm...
Despois decidimos ir a Ulm, para o cal había que coller o tren das 13:32. Por iso mercamos unhas salchichas e xantámolas no parque que hai ao lado da estación. Despois un xelado e ao tren.
En Ulm fixemos a ruta que me ensinara a guía, na que Alex subiu á torre e sacou unhas fotos interesantes. Nós agardamos abaixo onde mercamos algunha parvada nas tendas de por alí. Despois estivemos zapateados na herba dun dos parques até que nos deu a gana de marchar e coller o tren de volta.
Ao chegarmos, agardamos unha hora por ACS e Garnacho, aos que por suposto lles botei bronca porque non se pode facer iso en Alemania, nin tampouco ningures. Fomos ao Anatolien a polo Kebap e despois a tomar unha cervexiña a Schloßplatz, que foi cando me fun para deitarme cedo, aínda que non o conseguín!

Pois onte venres pola tarde, fomos a Neustaatsgalerie, que é un mueso de arte estilo como sería o "Novo Museo Galego" é dicir, que non é de ámbito alemán, senón do Bundesland e onde teñen unha caralluda colección, coma por exemplo Picasso, Matisse, Gaugain, Rembrant pero non catro, senón bastantes... incríbel, non imaxino isto na Galiza. O mellor de todo era unha escultura de cera dunha muller da limpeza que había nunha sala que parecía completamente de verdade...
Despois fomos con Álvaro, Garnacho e Eduarno xantar unha salchicha para xa marchar cara Essligen. Polo camiño leváronnos até a Capela dos Reis de Württenberg, pero só até abaixo, non nola ensinaron, co cal non valeu para nada. Ao chegar a Esslingen había uns rapaces a se bañar nunha fonte, coa calor que nós tiñamos. Por sorte, ao cabo de media hora, atopamos un bar onde bebemos todos e enchemos as botellas para seguir. Esslingen estivo ben, pero de todos os xeitos, é mais do mesmo. Son moi semellantes, pero belas, iso si.
Despois voltamos para se rexistraren, todos menos Alex, co cal o tivo que facer hoxe, perdendo o conseguinte tempo. Deitámonos na herba do parque un bo cacho, onde Álvaro e Garnacho fixeron algúns exercicios acrobáticos, pero case se matan no intento :-)
Despois, de camiño ao Hostel, unha salchichiña vermella e ala, para alá.
Colleron os portátiles para baixar até Schloßplatz, onde hai unha rede inarámica e onde todos baixaron o correo, e subiron artigos a barrapunto e despois apareceu por alí Miguel de Icaza, ao que lle dixen que eu era o que tiña que agardalo no aeroporto, e se desculpou :-) Bo rapaz, máis baixo do que agardaba. Estivemos falando con el sobre moitos temas e despois a tomar un Kebap ao sitio de sempre.

Pois onte foi o primeiro día da GUADEC. Tiven que me erguer ás 7:00 para poder estar ás 8:00 no lugar de celebración. A verdade é que non me apetecía un carallo. Tiven que pegar un par de carteis e facer un par de caralladas máis até a hora de comezar as conferencias. Fun a unha de Eclipse que non me convenceu, a unha sobre VNC na que só entendín as gráficas e despois chegou a hora de xantar, onde fomos un bo cacho de falantes de español, entre eles Miguel, que tiña ganas de xantar turco. Como había boa cantidade de xente que falaba alemán, ficou bastante abraiado. Por sorte, eu xa completara o cartón e puiden xantar o meu Kebap gratis :-)
Despois pola tarde tocou GStreamer, da que marchamos a toda présa porque era demasiado técnica. A seguinte que fixemos foi a do tutorial de Mono, que non me fixo graza porque o tema máis ca de Mono era de Gtk, e vai ser que xa estou afeito a traballar con iso, aínda que sexa noutra linguaxe, é o mesmo. Así que marchei ao final da charla de como captar usuarios para GNOME, pero tiven que me marchar en 10 minutos, porque me tocaba controlar o inicio doutra charla noutro lugar. Cando rematei isto, puiden ir á de "Optimal GNOME Programming", onde o fulano fixo un gran exercicio de autocrítica da plataforma sobre o uso de recursos. Despois fomos un pouco a tomar unha cervexiña á Paulaner e despois a cear todos ao Spagetissimo, de onde marchei porque xa me tiña que deitar...

Onte tamén me erguín ás sete da mañá para estar ás oito no lugar da GUADEC, pero non me serviu para nada, posto que non tiven nada que facer e estiven a enredar co portátil até que comezou a primeira charla, que foi a de Mark Shuttleworth, que nos ensinou as súas fotos do espacio, comentou algunhas pallas mentais e nos arengou tamén dun xeito interesante. Polas miñas verbas se pode entender que non me gustou, pero todo o contrario.
A seguinte charla foi unha sobre power management in GNOME. O fulano contou catro cousas e despois comezou a facer unha especie de charla colaborativa, polo que me deu tempo a ler todos os xornais...
E chegou a mellor charla de todas, "Windows Migration Study", que creo que se enmarcaba dentro do proxecto "Primates" de Ximian-Novell. Nela amosaban como se comportaban certos usuarios ante GNOME e KDE. Nos dous casos tiñan problemas e amosou de xeito clarificador algúns aspectos e algunhas cousas que se deberían coidar á hora de desenvolver escritorios e non, como dixo algunha persoa que sei eu... meter todas as cousas xuntas, non vaia a ser que queden espacios en branco...
A seguinte foi unha arenga, sobre por onde deberían ir os tiros e facendo tamén autocrítica de todas as cousas que como desenvolvedores expertos facemos mal, sen pensar nos usuarios...
Despois, veu a Hackingfest. Nós fomos á de usabilidade, que estivo baseada nos vídeos que nos amosaran na chalar de "Windows Migration Study". Había algunhas pequenas cousas que facer, pero a min non me deu tempo a nada porque nin sequera tiña o repositorio baixado, así que resultaba un pouco complicado. Por alí andaba Miguel de Icaza facendo fotos coma un auténtico xaponés, coa súa súper cámara reflex dixital que facía fotos de 8MB, pero claro, cunha memoria de 2GB...
Tiven que marchar axiña ao campus, por mor de ter que presentar o meu contrato alongado a miña vivenda, que se non o chego a facer, mañá xa me cortaban o acceso, e tería que agardar até o xoves para voltar facelo, sen internet eses días. A viaxe até o campus foi terríbel, porque esquecera a carteira na sala de Hacking e só tiña o teléfono de Juanjo, que o deixara na casa. Así que o que fixen foi chamar á organización para que fosen berrar o nome de Alex e Juanjo até a sala de Hacking para que me gardasen a carteira... O problema é que tampouco tiña o meu carné para viaxar no transporte público, nin documentación, así que se me chegan a parar, non sei que podería facer, porque de seguro me levarían á comisaría, por non ter documentación ningunha. Afortunadamente, non pasou nada. O que si pasou foi foi que me colleu unha molladura boa e aproveitei estar no campus para ducharme.
Despois fomos á festa no local, onde o frikómetro se dispararía aínda que non houbese ninguén da GUADEC alí, posto que se chamaba "*C64*" e tiñan pantallas onde amosaban videoxogos antigosm supoño que de C64, claro. Alí tiñamos dereito a catro cervexas pagadas por Novell. O carallo é que dixeran que 20€ por persoa con algo para cear, despois baixaron a 10€, e neste caso dixo Novell que o pagaban todo eles...
Tomei un Lamahcun e marchei para casa, que estaba a morrer do sono. Iso si, acompañei a Alex até Hauptbahnhof e despois botei a correr porque pensei que podía chegar ao tren que marchaba en 1 minuto, pero non foi posíbel, así que tiven que agardar 15 minutos. Que cacho de merda!